ധനുഷിന്റെ 'ടംഗ്ലീഷ് കൊലവെറി'

നിരാശാകാമുകന്മാര്‍ക്കായുള്ള ധനുഷിന്റെ 'ബാത്ത്‌റൂം സോങ്' ചരിത്രം സൃഷ്ടിക്കുകയാണ്.''വൈ ദിസ് കൊലവെറി, ഡീ?'' എന്ന ചോദ്യം ലോകമെമ്പാടുമുള്ള യുവജനങ്ങള്‍ ഏറ്റെടുത്തതോടെ, സ്രഷ്ടാക്കളെപ്പോലും അമ്പരപ്പിച്ചുകൊണ്ട് കുതിക്കുകയാണ് ഈ ഗാനം.പുറത്തിറങ്ങി ഒരാഴ്ചയ്ക്കകം ലോകസംഗീതപ്പട്ടികയില്‍ മൂന്നാംസ്ഥാനത്തെത്താന്‍ ഈ ഗാനത്തിനുകഴിഞ്ഞു.ഭാര്യ ഐശ്വര്യ സംവിധാനം ചെയ്യുന്ന '3' എന്ന തമിഴ് ചിത്രത്തിനുവേണ്ടിയാണ് ധനുഷ് ഈ പാട്ടുപാടിയത്.ചിത്രത്തിലെ നായകനായ അദ്ദേഹം തന്നെയാണ് ഗാനരചന നിര്‍വഹിച്ചതും.ഐശ്വര്യധനുഷ് ആദ്യമായി സംവിധാനം ചെയ്യുന്ന ചലച്ചിത്രമാണ് '3'.21 വയസ്സുമാത്രമുള്ള അനിരുദ്ധ് രവിചന്ദര്‍ എന്ന സംഗീതസംവിധായകന്റെ അരങ്ങേറ്റം അതിഗംഭീരമാകുകയും ചെയ്തു ഈ ഗാനത്തിലൂടെ.

ഇന്റര്‍നെറ്റില്‍ പ്രത്യക്ഷപ്പെട്ട് ആറുദിവസത്തിനകം 20 ലക്ഷം പേരാണ് ഈ ഗാനം ആസ്വദിച്ചത്.ഒരാഴ്ച പിന്നിട്ടപ്പോഴേക്കും, യുട്യൂബില്‍ സോണിമ്യൂസിക് അപ്‌ലോഡ് ചെയ്ത വീഡിയോ മാത്രം 30 ലക്ഷത്തോളം പേര്‍ കണ്ടു.ഫേസ്ബുക്കില്‍ 10ലക്ഷത്തിലേറെപ്പേര്‍ ഈ ഗാനത്തിന്റെ ആരാധകരായുണ്ട്.ട്വിറ്റര്‍ ഉള്‍പ്പെടെയുള്ള മറ്റ് സോഷ്യല്‍നെറ്റ്‌വര്‍കിങ് സെറ്റുകളില്‍ 'കൊലവെറി'ക്കൊപ്പം സഞ്ചരിക്കുന്നവര്‍ വേറെയും. മൊബൈല്‍ഫോണ്‍ റിങ്‌ടോണായും റേഡിയോ, ടെലിവിഷന്‍ ചാനലുകള്‍ വഴിയും ഗാനം അതിദ്രുതം പ്രിയങ്കരമായിക്കൊണ്ടിരിക്കുകയാണ്.സ്റ്റുഡിയോയില്‍ ഈ ഗാനം റെക്കോഡ് ചെയ്തതിന്റെ വീഡിയോയാണ് ഇപ്പോള്‍ പ്രചരിക്കുന്നത്.

നിരാശാകാമുകന്റെ വികാരം പൂര്‍ണമായും ഉള്‍ക്കൊള്ളും മട്ടിലുള്ള ധനുഷിന്റെ ആലാപനം ആദ്യകേള്‍വിയില്‍ത്തന്നെ ശ്രോതാക്കളെ കീഴ്‌പ്പെടുത്തുന്നു.പ്രണയനൈരാശ്യം വന്ന നായകന്‍ പാടുന്നമട്ടിലൊരു ഗാനമൊരുക്കാനാണ് സംഗീതസംവിധായകനോട് സംവിധായിക ആവശ്യപ്പെട്ടത്.തമാശനിറഞ്ഞ, ലളിതമായൊരു പാട്ടാണ് ഐശ്വര്യ ലക്ഷ്യമിട്ടത്.പത്തുമിനിട്ടിനകം അനിരുദ്ധ് ഈണമിട്ടു.ഇരുപതുമിനിട്ടുകൊണ്ട് ധനുഷ് വരികളെഴുതുകയും ചെയ്തു.പ്രണയത്താല്‍ മുറിവേറ്റ് ഹൃദയം തകരുന്ന അനുഭവം അത്രമേല്‍ പരിചിതമായതുകൊണ്ടും സംഗീതവും വരികളും ഏറ്റവും ലളിതവും രസകരവുമായിരിക്കുന്നതുകൊണ്ടും 'കൊലവെറി'യെ യുവജനങ്ങള്‍ ഏറ്റെടുക്കാന്‍ താമസമുണ്ടായില്ല.

തമിഴും ഇംഗ്ലീഷും ഇടകലര്‍ത്തിക്കൊണ്ടുള്ള 'ടംഗ്ലീഷി'ലാണ് ഈ പാട്ടെന്നത് ഇതിന്റെ സ്വീകര്യതയ്ക്ക് വേഗംകൂട്ടി.അതുകൊണ്ട്, തമിഴ് പരിചയമില്ലാത്തവര്‍ക്കുകൂടി ഇതിലെ വൈകാരികത ഉള്‍ക്കൊള്ളാന്‍ എളുപ്പം കഴിഞ്ഞു.പാട്ടിന്റെ രസികത്തം കൂട്ടാനും ഈ 'ടംഗ്ലീഷ്' മട്ട് ഉപകരിച്ചിട്ടുണ്ട്.പ്രണയഭംഗംവന്ന പാവം നായകന്റെ പരിദേവനങ്ങളാണീ പാട്ടിന്റെ ഉള്ളടക്കം.നിരാശാകാമുകന്മാര്‍ക്കുവേണ്ടി പ്രണയഭംഗഗാനം പാടാന്‍പോകുന്നുവെന്നൊരാമുഖത്തോടെയാണ് തുടക്കം.''എന്നെക്കൊല്ലാനുള്ള ഹാലിളക്കമെന്തിനാണെ''ന്ന് കാമുകിയോടു ചോദിക്കുന്ന ഗാനം പിന്നീട്, സുഹൃത്തിനോടുള്ള സംഭാഷണവും സംഗീതനിര്‍ദേശവുമൊക്കെയായി പുരോഗമിക്കുന്നു.'വൈറ്റ് സ്‌കിന്ന് ഗേള്', 'ഗേള് ഹാര്‍ട്ട് ബ്ലാക്ക്' എന്നിങ്ങനെയാണ് തന്നെ നിരസിച്ച നായികയെക്കുറിച്ചുള്ള വിവരണം.''കയ്യില് ഗ്ലാസ്സ്'' എന്ന മട്ടില്‍, പാട്ടിനിടയില്‍ അറിയാതെ തമിഴ് കടന്നുവരുമ്പോള്‍, ''ഓണ്‍ലി ഇംഗ്ലീഷ്'' എന്നു പറഞ്ഞ്,''ഹാന്‍ഡില് ഗ്ലാസ്സ്'' എന്നു തിരുത്തിക്കൊണ്ട് മുന്നേറുന്നതൊക്കെ ആസ്വാദകര്‍ക്ക് നന്നായി രസിച്ചിട്ടുണ്ടെന്നാണ് പ്രതികരണങ്ങളില്‍നിന്നു തെളിയുന്നത്.'ഐസ് ഫുള്ളാ ടിയറ്','എംടി ലൈഫ്','ലൈഫ് റിവേഴ്‌സ്ഗിയറ്' എന്നിങ്ങനെയാണ് സ്വന്തം അവസ്ഥയെക്കുറിച്ച് നായകന്‍ വിവരിക്കുന്നത്.

അനധികൃതമായാണ് ഈ ഗാനം ഇന്റര്‍നെറ്റില്‍ തുടക്കത്തില്‍ പ്രചരിച്ചിരുന്നത്.അതിന്റെ സ്വീകാര്യത തിരിച്ചറിഞ്ഞതോടെ ഔദ്യോഗികമായി പുറത്തിറക്കാന്‍ തീരുമാനിക്കുകയായിരുന്നു.ടെസ്റ്റ്‌ഡോസെന്ന നിലയില്‍ പാട്ടുമായി ബന്ധമുള്ളവര്‍ തന്നെയാവുമോ അനധികൃതമായി പ്രചരിപ്പിച്ചതെന്ന സംശയം ചിലരൊക്കെ ഉന്നയിക്കുന്നുണ്ട്.ഏതായാലും പാട്ട് ലോകം കീഴടക്കുന്നതില്‍ സംഗീതസംവിധായകനും ഗായകനും സംവിധായികയുമൊക്കെ വളരെ സന്തുഷ്ടരാണ്.ജനവരിയില്‍ പുറത്തിറങ്ങാന്‍ ലക്ഷ്യമിടുന്ന '3' എന്ന ചിത്രത്തിന് ഈ ഗാനം കാരണം വലിയ വരവേല്പുണ്ടാകുമെന്നും അവര്‍ പ്രതീക്ഷിക്കുന്നുണ്ട്.ശ്രുതിഹാസന്‍ നായികയാവുന്ന ഈ ചിത്രം നിര്‍മിക്കുന്നത് ധനുഷിന്റെ അച്ഛന്‍ കസ്തൂരിരാജയാണ്.ഏഴുഗാനങ്ങളാണ് '3'ലുള്ളത്.ധനുഷ് തന്നെയാണ് എല്ലാഗാനങ്ങളും രചിച്ചതെന്ന പ്രത്യേകതയുമുണ്ട്.ധനുഷും ശ്രുതിയും ഒന്നിക്കുന്ന യുഗ്മഗാനവും ഇതില്‍പ്പെടുന്നു.പുറത്തുവന്ന ഒരുഗാനം ഇത്രവലിയ ഹിറ്റാവുമ്പോള്‍ വരാനിരിക്കുന്നവയില്‍ എന്തൊക്കെ അതിശയമാവും ഉണ്ടായിരിക്കുകയെന്നറിയാനാണ് ആരാധകര്‍ കാത്തിരിക്കുന്നത്. 
അജിത്കുമാര്‍ കെ.കെ

Read more »

'മാനസമൈന'യും 'കൊലവെറി'യും

സിനിമയിലെ ഭഗ്നപ്രണയഗാനങ്ങളെക്കുറിച്ചുള്ള സങ്കല്പങ്ങളെ തകിടം മറിക്കുന്നതാണ് ധനുഷിന്റെ 'വൈ ദിസ് കൊലവെറി'പ്പാട്ട്.മാറുന്ന കാലത്തിന്റെയും മാറുന്ന മനോഭാവത്തിന്റെയും പ്രാതിനിധ്യമുള്ളതാണ് ഈ പാട്ട്.ഇതിന്റെ സ്വീകാര്യതകണ്ട്, ചലച്ചിത്രഗാനങ്ങളില്‍ മെലഡിയുടെ കാലം കഴിഞ്ഞുവെന്നു വിധിക്കുന്നത് വിഡ്ഢിത്തമായിരിക്കും 

ഭഗ്നപ്രണയങ്ങളുടെ ശാശ്വതസ്മാരകങ്ങള്‍ കടപുഴകുകയാണോ എന്നൊരാശങ്ക ഇപ്പോഴത്തെ 'കൊലവെറി' തരംഗത്തിനിടയില്‍ വേറിട്ടുകേള്‍ക്കുന്നുണ്ട്.ധനുഷ് നായകനാവുന്ന '3' എന്ന തമിഴ്ചിത്രത്തിനുവേണ്ടി അദ്ദേഹം തന്നെ രചിച്ച്, ആലപിച്ച ''വൈ ദിസ് കൊലവെറി ഡീ'' എന്ന ഗാനം ലോകം കീഴടക്കിക്കൊണ്ടിരിക്കുമ്പോള്‍ പഴയ 'പ്ലാറ്റോണിക് ലൗ'വിന്റെ വക്താക്കള്‍ അത്ര സംതൃപ്തരല്ല.അക്കൂട്ടരുടെ അതൃപ്തി പലമട്ടില്‍ പുറത്തുവന്നുകൊണ്ടിരിക്കുന്നുണ്ട്.''ഇതൊരു പാട്ടാണോ?'' എന്ന പുച്ഛരസംനിറഞ്ഞുകവിയുന്നൊരു ചോദ്യമാണ് എതിര്‍പ്രതികരണങ്ങളുടെ പൊതുസ്വഭാവം.പ്രണയഭംഗം വന്ന നായകന്റെ പാട്ടാണെന്ന മട്ടിലാണല്ലോ 'കൊലവെറി' കാര്യമായി പ്രചരിച്ചത്.പാട്ടിന്റെ നിലവാരത്തെപ്പറ്റി വലിയ അവകാശവാദങ്ങളൊന്നും ധനുഷ് ഉയര്‍ത്തിയിട്ടില്ല.'ബാത്ത് റൂം സോങ്' എന്നാണ് അദ്ദേഹം അതിനെ വിശേഷിപ്പിച്ചത്.അതുകൊണ്ടുതന്നെയാകണം അത് ഇത്രവലിയ തരംഗമായിത്തീര്‍ന്നതും. ശുദ്ധസംഗീതത്തിന്റെ ഹൃദയംകീറിക്കളയുന്നൊരേര്‍പ്പാടാണ് ധനുഷും സംവിധായികയായ ഭാര്യ ഐശ്വര്യയും അവരുടെ ബന്ധുകൂടിയായ സംഗീതസംവിധായകന്‍ അനിരുദ്ധുംകൂടി ഒപ്പിച്ചതെന്ന് കോപിക്കുന്നവര്‍ക്ക് ന്യായങ്ങള്‍ ഏറെയുണ്ട്.'കൊലവെറി' വന്നതോടെ നമ്മുടെ പഴയ പാവം 'മാനസമൈന'യൊക്കെ പറന്നൊളിക്കേണ്ടിവരികയില്ലേ എന്ന സങ്കടവും ഇതോടൊപ്പമുയരുന്നുണ്ട്.

'കൊലവെറിപ്പാട്ട്' പ്രണയഭംഗത്തിനെ കോമഡിയാക്കിത്തീര്‍ക്കുന്നുവെന്നതാണ് ഏറ്റവും പ്രധാനപ്പെട്ട കാര്യം.ഭഗ്നപ്രണയങ്ങളെ അത്യുദാത്തമായി ആഘോഷിച്ചുപോന്നൊരു നാട്ടില്‍, അതിനെ കീഴ്‌മേല്‍മറിച്ചൊരു സംഗതി ഇത്രമേല്‍ സ്വീകരിക്കപ്പെട്ടതെങ്ങിനെ? സിനിമയിലെ മനോഹരവരികളേറെയും പ്രണയവുമായി ബന്ധപ്പെട്ടാണല്ലോ രചിക്കപ്പെട്ടിരിക്കുന്നത്.മലയാളികളുടെ സ്വന്തം 'മാനസമൈന'യുടെ കാര്യംതന്നെയെടുക്കുക.പ്രണയം പാളിയാല്‍ പാടേണ്ട പാട്ട് അതാണെന്ന കാര്യത്തില്‍ മലയാളികള്‍ക്ക് സംശയമേതുമുണ്ടായിരുന്നില്ല ഈയടുത്തകാലം വരെ.പക്ഷേ,വേഷവിധാനവും രൂപവും പരീക്കുട്ടിയുടേതുതന്നെയാവണമെന്ന് നിര്‍ബന്ധമുണ്ടായിരുന്നില്ല.അത് ദേവദാസ്മട്ടിലാവുന്നതിലായിരുന്നു കമ്പം.

തടവാന്‍ താടി, കണ്ണില്‍ കടും ശോകം,ഉള്ളിലെ സങ്കടക്കടലിനു ബദലായി കൈയില്‍ ലഹരിതുളുമ്പും കുപ്പി-ഇമ്മട്ടിലൊക്കെയാണ് വിഷാദകാമുകന്മാര്‍ സിനിമകളില്‍ സ്വസ്ഥമായി കഴിഞ്ഞുകൂടിയിരുന്നത്.മലയാളത്തില്‍ മാത്രമല്ല, മറ്റെല്ലാ ഭാഷകളിലും ഇങ്ങനെ അതിവൈകാരികതയുടെ ഉത്തുംഗശൃംഗങ്ങളിലായിരുന്നു അക്കൂട്ടര്‍ പാര്‍പ്പുറപ്പിച്ചിരുന്നത്.ഈ സങ്കടമൊക്കെ സിനിമയില്‍ കണ്ട് കണ്ണീരൊഴുക്കുന്നവര്‍ പോലും നിത്യജീവിതത്തില്‍ ഇമ്മാതിരി സീനിനുമുമ്പില്‍പ്പെട്ടാല്‍ ചിരിച്ചുകുഴഞ്ഞുപോകാറാണ് പതിവ്.കണ്ടുനില്‍ക്കുന്നവര്‍ക്ക് തമാശയാകുന്നൊരു സംഗതി മാത്രമാണ് ഭഗ്നപ്രണയം എന്നര്‍ഥം.അതിനെ വൈകാരികമലവെള്ളപ്പാച്ചിലില്‍ കുളിപ്പിച്ചെടുത്ത്, പശ്ചാത്തലസംഗീതവും ഫ്ലാഷ്ബാക്ക്ദൃശ്യങ്ങളും സഹിതം വെള്ളിത്തിരയില്‍ കാട്ടിത്തരുമ്പോള്‍ പാവം കാണികള്‍ അതില്‍പെട്ടുപോകുന്നുവെന്നേയുള്ളൂ.പ്രണയനിരാസത്തിന്റെ കയ്പ് അനുഭവിക്കാത്തവര്‍ അപൂര്‍വമായിരിക്കുമെന്നതിനാല്‍, സ്‌ക്രീനിലെ താരത്തിന്റെ അവസ്ഥ തന്റേതുതന്നെയെന്ന ഐക്യപ്പെടലില്‍ ഈ സങ്കടം കുറേക്കൂടി യഥാര്‍ഥമെന്നു തോന്നുന്നത് സ്വാഭാവികം.എങ്കിലും, ഇത്തരം പ്രണയാതിശയങ്ങളും സങ്കടക്കടലുകളുമൊന്നും ഇക്കാലത്തെ ചലച്ചിത്രങ്ങളില്‍ അത്രയേറെ കാണാനാവില്ല.പ്രണയഭംഗത്തിന് അര്‍ഹിക്കുന്നതില്‍ കവിഞ്ഞ പ്രാധാന്യമില്ലെന്ന നിലപാടെടുക്കുന്ന സിനിമകള്‍ പലതും വന്നുകഴിഞ്ഞു.ഭഗ്നപ്രണയത്തിന് അഭൗമപരിവേഷം നല്‍കിയാല്‍ ഇക്കാലത്ത് ചിരിയാണുണ്ടാവുകയെന്നും പല സിനിമകളും തെളിയിച്ചു.എങ്കിലും, തകര്‍ന്നപ്രണയത്തെ ആഘോഷമാക്കുന്ന പാട്ടിന് ഇത്രമേല്‍ സ്വീകാര്യത കിട്ടുന്നത് പുതിയൊരു കാര്യമാണ്. 

പ്രണയഭംഗത്തിനിരയായ നായകന്‍ ഒരു കോമഡിപ്പീസാണെന്ന കാഴ്ചക്കാരുടെ വീക്ഷണകോണില്‍നിന്നാണ് ഈ പാട്ടിന്റെ വരവ്.വിശുദ്ധപ്രണയത്തിന്റെ വക്താക്കള്‍ക്ക് കോപം തോന്നിയില്ലെങ്കിലല്ലേ അത്ഭുതപ്പെടാനുള്ളൂ!

മെലഡിയുടെ ശത്രുവെന്ന മട്ടില്‍ 'കൊലവെറി'പ്പാട്ടിനെ ചിത്രീകരിക്കുന്ന വാദങ്ങള്‍ ഇന്‍ര്‍നെറ്റ്ചര്‍ച്ചകളില്‍ പലരും ഉന്നയിക്കുന്നുണ്ട്.വാസ്തവത്തില്‍, അത്രയ്‌ക്കൊക്കെ അപകടമുണ്ടോ?'സന്യാസിനീ നിന്‍ പുണ്യാശ്രമത്തില്‍' എന്നോ 'മംഗളം നേരുന്നു ഞാന്‍' എന്നോ 'സുമംഗലീ നീ ഓര്‍മിക്കുമോ' എന്നോ ഒക്കെ മെലഡിയില്‍ മുങ്ങിപ്പൊങ്ങിയിരുന്നൊരു പുഷ്‌കലകാലത്തെക്കുറിച്ചോര്‍ത്ത് നേടുവീര്‍പ്പിടാനേ കഴിയൂ എന്ന സ്ഥിതിയാണോ 'കൊലവെറി'യുടെ സ്വീകാര്യത കാരണം ഉണ്ടായിരിക്കുന്നത്? 'അരികില്‍ നീ ഉണ്ടായിരുന്നെങ്കില്‍' എന്നൊന്നു മൂളിപ്പോയാല്‍ പരിഹാസം നിറഞ്ഞ നോട്ടങ്ങള്‍ നീളുമെന്നു പേടിക്കേണ്ടി വരുമോ?ശത്രുതാമട്ടില്‍ സമീപിക്കാനുള്ള കുഴപ്പമൊന്നും 'കൊലവെറി'പ്പാട്ടിനില്ല.

Read more »